7-nji martda Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine amala aşyran saparynyň dowamynda şäheriň häkimi G.Mämmedowanyň hem-de Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň gatnaşmagynda iş maslahatyny geçirdi.

«Watan» habarlar gepleşiginde berlen maglumata görä, maslahatyň dowamynda Mämmedowa gurluşygyň birinji tapgyrynyň çäklerinde gurlan ýaşaýyş jaýlaryna ilaty göçürip getirmek işleriniň barşy barada habar berdi. Onuň aýtmagyna görä, jaýlara göçürmek işleri tassyklanan maksatnama laýyklykda amala aşyrylýar, şäheriň arassaçylyk we abadanlaşdyrylyş derejesi degişli ýagdaýda saklanylýar.

Şeýle hem Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň bäş ýyllygy mynasybetli meýilleşdirilen medeni-köpçülikleýin çäreleriň we dabaralaryň maksatnamasy barada maglumat berildi.

Hasabaty diňläp, Milli Lider ilatyň durmuş derejesini has-da ýokarlandyrmagy göz öňünde tutmak bilen, ýaşaýjylary täze jaýlara göçürmek bilen bagly meseleleriň toplumlaýyn esasda çözülmelidigini nygtady. Ol binalaryň enjamlaşdyrylyşyna we sanly tehnologiýalaryň ornaşdyrylmagyna yzygiderli üns bermegiň zerurdygyny belledi.

Gaznanyň bäş ýyllygy mynasybetli geçiriljek çäreler barada durup geçmek bilen, Gurbanguly Berdimuhamedow olaryň ýokary guramaçylyk derejesinde geçirilmeginiň möhümdigini aýtdy.